جيلاني، ولايت شاهه سيد: سيد ولايت شاهه ولد سيد بگن شاهه جيلاني، ڳوٺ انباهه شريف، تعلقي لکي، ضلعي شڪارپور ۾ 1329هه مطابق 1911ع ۾ پيدا ٿيو. ننڍپڻ ۾ پنهنجي والد سيد بگن شاهه جو طالب ٿيو. ٻالڪپڻ کان وٺي فقيري حال مٿس موجود هو. پاڻ سنڌي ۽ سرائڪي شاعري ڪندو هو، سندس قلمي رسالو موجود آهي. شاهه عبداللطيف ڀٽائي، صوفي شاهه عنايت شهيد، صوفي محمد فقير کٽياڻ، قلندر لعل شهباز ۽ ٻين صوفين جي درگاهن تي وڃي راڳ ڳائيندو هو. ماڻهو سندس ڪلام ٻڌي محو ٿي ويندا هئا. ڪيترائي سندس طالب ٿيا. هيءُ 16 مارچ 1982ع تي وفات ڪري ويو.